№51 ЖОББМ-де Тәуелсіздік күніне арналған "Өнерім саған, Тәуелсіз Қазақстаным" атты мерекелік іс-шарасы
№51 Жалпы орта білім беретін мектебінде Тәуелсіздік күніне арналған «Өнерім саған,Тәуелсіз Қазақстаным» атты мерекелік іс-шараның бағдарламасы
Өтетін күні: 15.12.2022ж.
Уақыты: 12.00
Өтетін жері: АКТ залы
«ФАН-ФАР» (хабарланбайды)
1 - жүргізуші:
Армысыздар, құрметті ұстаздар, оқушылар және қадірменді қонақтар! Бүгін Тәуелсіздігіміздің 31 жылдығына арналған тарих-география бірлестігінің он күндігінің қорытындысы ретінде және «16 желтоқсан - Қазақстан Республикасының Тәуелсіздігі күні» мерекесіне ұйымдастырылған «Өнерім саған,Тәуелсіз Қазақстаным» атты мерекелік кешімізге қош келдіңіздер!
Тәуелсіздік - ең басты құндылығымыз. Тәуелсіздікке қол жеткізгеннен кейін ғана елімізді әлемнің өркениетті мемлекеттерінің қатарына қоса алдық. 31 жыл ішінде тәуелсіз Қазақ елін қалыптастырып, осы кезеңде Қазақстанды дүние дидарындағы ең мықты мемлекеттер танитындай, сыйлайтындай деңгейге жеткізген тұңғыш Елбасымыз Нұрсұлтан Әбішұлы Назарбаевтай көреген саясаткердің ерен еңбегін дәл бүгін және әрқашанда айтып өтеміз.
Тәуелсіздік күні еліміздің барлық азаматтары үшін орны ерекше мереке деп білеміз, себебі, осынау жүрекжарды қуанышқа толы күнді ата - бабаларымыз ғасырлар бойы армандап, күтумен өтті.
2 - жүргізуші
Қаһарманын ұмытпайды халықтар
Өткен күнді тарихымыз анықтар.
Ерлігіңе тағзым етем қашанда,
Тәуелсіздік алып берген Алыптар!
Тәуелсіздік жолында күресіп, жанын құрбан еткен батыр бабаларымыздың, айбынды аталарымыздың, қайсар ағалармыздың рухына бас иіп, бір минут үнсіздікпен еске алайық.
(1 минут үнсіздік)
1 - жүргізуші
Армандарды жақындатып тым алыс,
Біздің жаққа жеткен екен жылы ағыс.
Егемендік - ел бақыты, ертеңі,
О, халайық! Құтты болсын қуаныш!
2 - жүргізуші:
Кең байтақ, көз жетпейтін жерім менің
Таулы орман, жасыл жайлау көлім менің
Бүгінде бар әлемге даңқың жетті
Тәуелсіз Қазақстан – елім менің
/Әнұран орындалады/
Құттықтау сөз кезегін мектебіміздің директоры Шырынбеков Нұрбол Талатбекұлына береміз.
1-жүргізуші:
Қазақ халқы талай қиындықты бастан кешірсе де, ешқашан мойымай, күресе білді. Азаттық таңы туатынына кәміл сеніп, үміттерін үзбеді.
«Ұраны-алаш, керегесі-ағаш» елдің атынан сөз айтқан ұлы бабамыз Қаз дауысты Қазыбек биге биыл 355 жыл толып отыр.
Халқымыздың айтулы кемеңгер билерінің бірі- Қаз дауысты Қазыбек би шешендігімен дараланып, көзге түскен тарихи тұлға. Оның аты әйгілі Абылай хан, Бұқар жырау , Төле би, Әйтеке билермен қатар аталады. Қазыбектің шын мәніндегі шешендігі мен жер жарған даңқы кешегі «Ақтабан шұбырынды, Алқакөл сұламада» бүкіл қазақ даласына жайылады. Ол халқымыздың басына ауыр күн туып, не ел болу, не құрып кету қаупі төнген қиын сәтте суырылған шешендігімен, алғыр да білгір көсемдігімен ел намысын қорғап қалған.
/Қазыбек би нақыл сөздері мен батасы/
Дәулеткерейдің күйі орындайтын 10ә сынып оқушысы Айдар Азамат
2-жүргізуші
Ия, Небір сын сәттерде Отан үшін отқа кеудесін тосқан аға ұрпақтың қатарында қазақ халқының батыр қыздары мен ұлдары да болды. Соның ішінде Кеңес Одағының Батыр қызы Мәншүк Мәметова. Биыл Мәншүк Мәметованың туғанына 100 жыл толып отыр,туған жерді қасиет тұтып, ата-мекенін, Отанын қорғауда үлкен ерлік көрсетті. Қанға боялған даласы, аңыраған анасы, жетім қалған балалар үшін шайқасты.
Мен оның түнін сүйем, күнін сүйем,
Ағынды өзен, асқар тау, гүлін сүйемін.
Мен оның құдіретті үнін сүйем.
Бар жәндігін сүйемін қыбырлаған,
Бәрі маған Отан деп сыбырлаған.
Бозторғайы бол оның шырылдаған
Отан, Отан
Бәрінен биік екен,
Мен оны мәңгілікке сүйіп өтем,- деп ақын Мұқағали жырлағандай, әрбір қазақтың жүрегінде Отан туралы сезім жоғары тұрады.
/Сахнада Мәншүк монологы кетеді/
Ән: «Тәуелсіз елдің қызымын» орындайтын Сәкен Ұлбосын
КӨРІНІС «Мемлекетік рәміздер тарихы»
Ән: Көк тудың желбірегені
1 - жүргізуші:
Ту тігілді халқымның бүгін бағына
Жас өрендер желбіретіп нық ұста
Ғасырларға жалғастырып елдікті
Дақ түсірме ата баба рухына
Үлгі бізге аталардың ерлігі
Ұлағаты өнегесі еңбегі
(0қушылар «Тәуелсіздікке» арналған өлеңдерін айтады)
2-жүргізуші
Бізге тәуелсіздік туын, қазақтың көк байрағын биік көтеріп, ел екенімізді дәлелдеп, дүние жүзіне танылуымызға себеп болған және дүниені дүр сілкіндірген Желтоқсан оқиғасына биыл 36 жыл толып отыр.
«Мен - қазақ, қазақпын деп мақтанамын,
Ұранға «алаш» деген атты аламын» - деп азаттықты аңсаған, сол жолда аянбай қызмет еткен алаш арыстарының барлығы да қуғын – сүргінге ұшырап, Сталиндік қызыл террордың құрбандары болды. Сол алаш қайраткерлерінің азаттық идеясын жалғастырған, қыршын кеткен арыстардың аманатын арқалаған кейінгі толқын іні – қарындастары 1986 жылдың желтоқсанында тәуелсіздік үшін күресе білді.
«Егемен ел Қазақстан» Орындайтын: 6 - сынып оқушысы Аман Аруна
1-жүргізуші:
Тәуелсіздіктің түп тамыры «Желтоқсан» оқиғасына тікелей байланысты екендігіне ешкім дау айта алмас. «Түбін білмеген тексіз» деген қазақтың ғажап сөзі осындайдан шықса керек. Себебі, тәуелсіздіктің түп тамыры сонау бабалар ар – намысынан туындап жатқан жоқ па? Бейбіт шеруге шығып, билік тарапынан кінәлі деп саналған жастарымыздың бір бөлігі қанды қырғында көз жұмса, аман қалғандары өздері аңсаған азаттықтың қызығын көруде. Уақыт емші деп өзімізді жұбатқанымызбен, қыршын кеткен бауырларымыз есімізге түскенде жан – жарасы жаңғырып, қайғының айықпас дертіне шалдыққаныңды терең сезіне түсесің. Қайрат Рысқұлбеков, Ләззат Асанова, Сәбира Мұхамеджанова, Ербол Сыпатаев сынды қандастарымызды естен шығару мүмкін бе?
Интерактивті тақтада: Ролик кетеді
«Желтоқсан желі» Орындайтын 7 А сынып оқушысы Әшірбекұлы Нұржалғас
2-жүргізуші:
Бүгінгі ұрпақ болар елдің ертеңі дей келе бүгінгі тәуелсіздігіміздің 31 жылдығына арналған «Өнерім саған,Тәуелсіз Қазақстаным» атты мерекелік кешіміз бен Тарих-география бірлестігінің он күндігінің жабылуы да өз мәресіне де келіп жетті.
Тәуелсіздік күні мерекесі күнімен тұспа-тұс келген апталықтың қорытындысы ретінде ұйымдастырылған викториналық сайыстың нәтижесіне назар аударсаңыздар.
/РОЛИК/
Ән: Менің Қазақстаным» Орындайтын 5 А сынып оқушысы Жұмабек Ерлан
(Барша бала артында шығып тұрады, қолдарында шар мен жалауша)
1-жүргізуші:
Қазақ елім!
Туды жастық дәуірің.
Алғандайсың жұлдызыңның жарығын.
Тәуелсіздік құтты болсын, қымбаттым,
Туған күнің құтты болсын, алыбым!
2-жүргізуші:
Тәуелсіздігіміздің тұғыры биік, халқымыздың еңсесі жоғары, егемендігіміз баянды болсын!
Бірге: Қош, сау болыңыздар!
