Бастауыш сынып мұғалімі Оштаева Ұлжан Оштайқызының атына берілген бастауыш сынып кабинетінің ашылу салтанаты
28.08.2022ж.
Бастауыш сынып мұғалімі Оштаева Ұлжан Оштайқызының атына берілген бастауыш сынып кабинетінің ашылу салтанатының
іс - шара жоспары:
( Қызыл лента қию рәсімі орындалады,шашу шашылады,қонақтарды кабинетке отырғызу)
Жүргізуші:
-Құрметті мектеп ұжымы!
-Қадірлі ұстаздар мен қонақтар!
-Бүгін - біз үшін үлкен қуанышты күн!
Мектебімізде көп жылдар бойы ұстаздық еңбек еткен,саналы ғұмырын бала оқытуға арнаған ұлағатты ұстазымыз Оштаева Ұлжан апайымыздың атына жаңа кабинет ашылғалы отыр.Қуанышымызды бөлісуге келгендеріңізге үлкен алғысымызды білдіреміз!
Кішкентай балапандарымыз жақсы жабдықталған кабинетте білім алып,еліміздің тұтқасын ұстар азаматтар болып өсе берсін!
(Ұстаз өмірінен фотослайдтар жүргізіледі,қысқаша өмірбаян оқылады)
Өмірбаян
Оштаева Ұлжан Оштайқызы 1950 жылдың 2 наурызында Оңтүстік Қазақстан облысы,Бөген ауданы,Ленинжол ауылында дүниеге келген.1967 жылы Шымкент қаласындағы №7 Қ. Спатаев атындағы мектеп – интернатын үздік бітіріп,1969 жылы отбасын құрады.Алғашқы еңбек жолын ұстаздықтан бастаған Ұлжан апайымыз 1972 жылы өзі оқыған Қ.Спатаев мектебінде неміс тілінен сабақ береді.1980 жылы Шымкент педагогикалық институтының «Бастауыш мектеп педагогикасы мен методикасы» мамандығына сырттай оқуға түсіп,осы жылы Ленин атындағы №29 орта мектептің бастауыш сынып мұғалімі болып ұстаздық қызметін жалғастырады.Қазақстан Республикасы бойынша білім саласына енгізілген жаңалықтары бойынша 1986 жылы алғашқы рет 6 жастан оқыту экспериментін іске асырып, «Облыстық әдіскер» атағын алады.Кейінгі жылдары мектеп атауы №51 Төле би мектебі болып ауыстырылып,осы мектепте ұзақ жылдар бойы бастауыш сынып мұғалімі болып жұмыс істейді.Өзінің еңбекжолында Ұлжан Оштайқызы бірнеше рет Облыстық,Республикалық деңгейдегі марапаттарға ие болды.2000 жылы Білім және ғылым министрлігінің енгізген «Жаңа буын оқулықтарын мектеп тәжірбиесіне енгізудің теориясы мен практикасы»экспериментін сәтті аяқтап,тамыз педагогикалық оқуларында министрдің Алғыс хатымен ,қала әкімінің мақтау қағаздарымен марапатталады.Ұлжан апайымыздың көптеген шәкірттері бүгінде әртүрлі салада еңбек етіп жүр.Атап айтсақ: Саржанова Айнур ОҚМА-педиатрия мамандығы бойынша бітіріп,бүгінде қалалық емханада дәрігер реабилитолог қызметін атқаруда,Жолшиева Гульнар ОҚМА – невропатолог мамандығын алып,Созақ ауданында невропатолог болып қызмет атқаруда,Е.Б.Елеусізов Жамбыл обл бойынша сыбайлас жемқорлыққа қарсы іс – қимыл агенттігінің департамент ұйымдастыру – бақылау басқармасы инспекциясының басшысының орынбасары болып қызмет атқарады.Өз тәжірибесінде түрлі инновациялық идеяларды енгізіп,білім саласын ұштай білген Ұлжан Оштайқызының бүгінгі күні екі қызы мен екі келіні білім саласындағы идеяларын жалғастырып келеді.
Жүргізуші:
Талай күндер төккен термен өткен күн,
Қуаныштың нәрі көктен сепкен күн.
Талай жылдар тағылымы еленіп,
Бүгін міне, ескеріліп жеткен күн, –
деп бүгінгі Ұлжан апайымыздың атына берілген кабинеттің ашылу салтанатын ашып беру үшін ортаға мектеп директоры Шырынбеков Нұрболат Талғатұлын шақырамыз.
Жүргізуші:
Еткен еңбектің еленгені кімге де болса қуаныш,көңілге медет.
Ұлжан апайымызбен осы мектепте ұзақ жылдар бойы бірге жұмыс жасаған ардагер ұстаздарымыз келіп отыр.Арамызда қонақта отырған көшбасшы ұстаздарымыз:Баймаханова Орын,Баймаханова Розбике, Кенжебаева Алиша, Кожихова Раушан апайларымызды ортаға шақырамыз. Бірге жұмыс жасаған ұстаздарымыздан ұстаз,құрбы ретінде естеліктер айтып беруін сұраймыз.
Жүргізуші:
Ел үшін аянбай қызмет ету басты парыз деп санайтын, ұлт мүддесін ойлаған абзал да ардақты азамат Құрал ағамыз өзінің білім алған киелі алтын ұя мектебіне жай түлек емес, ел ағасы, ел қадірлейтін азамат,тек қазақ елі емес, бүкіл түркі жұртшылығы құрметтейтін ақын,ауылымыздың «Ақсақалдар алқасының» төрағасы.Сөз кезегін Құрал ағамызға береміз.
Жүргізуші:
«Ұстаз» деген сөз қазақ баласы үшін қашанда қасиетті,қадірлі болған. «Ұстаздан тәрбие алған», «Ұстаз алдын көрген» деген сөздер «Ана тәрбиесін алған» деген сөздермен ұштасып жатады.Шәкірттерге білім беруде ұстаздардың еңбегі ұшан теңіз.Сондықтанда ұстаз әрбір адамзаттың жүрегінде әрдайым қасиетті тұлға болып қалады.
Ұстаз деген- жарық күні ғаламның,
Ұстаз деген – анасы ол адамның.
Бүкіл әлем мойындайды еңбегін,
Сен де одан адам болып жаралдың,
-дей отырып,бүгін мектебімізге 20 жыл бұрын Ұлжан апайымыздың оқытқан шәкірттері келіп отыр.Сөз кезегін Ұлжан апайымыздың шәкірттеріне береміз.
Жүргізуші:
Отбасы – Отан негізі.Көп нәрсе кім – кінің де отбасына,сол шаңырақтағы тәлім – тәрбиеге,өнеге мен үлгіге тікелей байланысты.Ұлдары әке жолын қуса, маман,қыздары ана жолын қуып ұстаз болып,аналарның ізін жалғап келеді.
Ұлы Қаринбаев Сағитжан әке жолын қуып қазіргі таңда жеке кәсіпкер.
Ұлжан апайдың қыздары да білім саласында қызмет етіп келеді. Майра Рахымбаева Ұлттық Сауаттылық қауымдастығының директоры, оқытушы тренер, «Кел, балалар, оқылық!» журналының редакторы, Нұр-Сұлтан қаласында қызмет істейді.
Каринбаева Жанар №65 мектептің бірінші орынбасар қызметін атқарады.
Ене жолын жалғастырып, мектебімізде бастауыш сынып мұғалімі болып жүрген Ақеркенің еңбегіне де тоқталмай кету мүмкін емес.Ізденуден жалықпайтын,жаңалыққа жаны құмар,білімін үнемі жетілдіріп жүретін жақсы маман иесі.Шәкірттерін кітап оқуға баулып,рухани дүниені тек көркем шығармалар арқылы бере аламыз деп жүрген Ақеркеден ұстаз ененің тәрбиесін алғандығын көреміз.Келесі сөз кезегін отбасы мүшелеріне береміз.
Жүргізуші: Бүгін біздер жаңа кабинеттің тұсаукесер рәсіміне жиналып отырмыз.Сіздерге арналған концерттік бағдарламамызды қабыл алыңыздар.
1.Мухаммеджанова Амина «Ұстазым»
2. .Мухаммеджанова Амина «Мереке»
3.Рахымбай Кәусар «Апатайым»
(Концерттік бағдарлама)
Жүргізуші:
Ғылым иесі ғалымда,ел қорғаған батыр да,тілінен бал тамған ақын да,егін салған диқан да,ел басшысы патша да бәрі –бәрі ұстаздан тәлім алған,сондықтан барлық құрмет ұстаздарға арналады.
(Барлығы хормен «Ұстазым» әнін орындайды)
Жүргізуші:
Тағы да баршаңызды жаңа кабинеттің ашылуымен құттықтаймыз!Жаңа кабинет жаңаша жұмыс жасайды,осында оқитын оқушылар заман талабына сай жақсы,терең білім алады деп сенеміз.Бүгінгі іс - шарамызға уақыт бөліп келгендеріңізге көп – көп алғысымызды білдіреміз.
